آنا وطن ايلك سئوديگيم
"يالان دئسه م يانسئن ديليم "
جانيمدان چوخ ايسته ديگيم
قلبيمده قان جسميمده جان
آذربايجان، آذربايجان
جيران قاچار اغلاريندا
گول آغاجلي باغلاريندا
گه زسه م بهارچاغلاريندا
قؤجا عمروم اؤلار جوان
آذربايجان، آذربايجان
سن ايگيت لر آناسي سان
اصلان لارين يوواسي سان
خسته لرين دواسي سان
سن طبيب سن هم ده لقمان
آذربايجان، آذربايجان
اؤدلار، آلاولار دياري
ئؤلكه لرين شان، وقاري
سن يئتيردين شهرياري
سؤز ملكونون شاهي قطران
آذربايجان، آذربايجان
نظامي دن آلدين نظام
صائب وئريبدير استحكام
نسيمي، اوحدي، همام
مهستي، صابر،ناتوان
آذربايجان، آذربايجان
عاشيق لرين سازين چالار
قوچ كوراؤغلو گئديك آلار
هامي سنده ن گئري قالار
سن – سن شرقه ايشيق ساچان
آذربايجان، آذربايجان
چؤللرينده تر بنفشه
گؤي چمنلره ، ياشيل مئشه
عشقين اؤلوب منه پئشه
قارتاللارين داغلار آلان
آذربايجان،آذربايجان