قوجالار تک ائوی چوخداندی یاتاق ائیله میشم
یورولوب سور سوموگوم دای اوتوراق ائیله میشم
گئجه لر صبحه کیمین خاطره لردن سوز آچیب
او کئچن گونلری ذهنیمده سوراق ائیله میشم
یاغی یوخ لامپایا بیر ذره ده گلمیر گمانیم
نئیله مک من آیی ظلمتده چراغ ائیله میشم
شور چورکدن سورا یوخ سفره ده بیر آیری یئمک
اودوکی ائللریمی شعره قوناق ائیله میشم
باش آغاردیقجا جوانلیق منه دای شیللاق آتیر
منده نای نای چاغیریب روحی اوشاق ائیله میشم
قورویوب چشمه لرین گوزلری ائللر اوزونه
بو آخان گوز یاشیمی منده بولاق ائیله میشم
اکدیگیم بستانیمین قارپیزی جیر جیردی بوتون
ناشی بستانچی کیمین ناشی آلاق ائیله میشم
کونده میز تندیره یاپدیقجا دایان مور توکولور
کوته گئتمیش چوره گی نئچه تاباق ائیله میشم
کر مه لیک لرده قوجام یازدا یاپان یاپالاری
توپلاییب بیرطرفه منده قالاق ائیله میشم
سوزی بیر بیر داریوب قاره هورک تک قلمیم
نئچه یول شانه وئریب بیرده داراق ائیله میشم
دایانار داغ داغا البته مثل دور بوکلام
فکرتم شهریاری منده دایاق ائیله میشم