ائلیمین گوللری سولموش قارا یئل قوینوندا

بیر اوزان كؤرپوده سینمیش ساری تئل قوینوندا

بیزیم ائلده داغا بنذیر سارا سئل قوینوندا

نیگران قالماسین ائل خان چوبانی دار گونده

گه له جكدیر گؤروشه داردا قالان یار گونده



هله یاتمیش ائله باخ قایغی سی باشدان آشمیش

سئل اولوب نیسگیلی دولدوقجا اوره گدن داشمیش

بو ائلین ائلچی سی دارگونده قالانلار شاشمیش

بیری وار الده قرنفیل دولانیر دیللرده

اؤزونو چن بورویوب قارداشی نیسگیللرده



اویانین بذ قالاسیندان ائله بیل های گلدی

بیزه قیسمت دییه سن تانریدان آل پای گلدی

سینه گرمیش ساوالاندان بیر اتك یای گلدی

چئكیلین داغلارا چیلغین دلی لر گون باتدی

قارا ظولمت گونشین كؤرپه جیگین آغلاتدی



بو نه یاتماقدی قارانلیق چؤكولوب هر یئرده

گونشین گؤز یاشی دن-دن تؤكولوب هر یئرده

تانرینین كؤینه گی دالدان سؤكولوب هر یئرده

قالانیب داغ كیمی درد اوستونه خالقین دردی

نه دورومدور بو نه دحشت بیزه اوز چؤندردی؟!!



بیلیرم داغدا دومان وار و...یولوم داشلانمیش

آنامین گوزگوسو باشدان – باشا قارقیشلانمیش

نه بیلیم بلكه ده شعریمده كولك باشلانمیش

گئدیرم چنلی اوزاندان دئمیرم قوی قالسین

او سینیق كؤرپوده آخشام چاغی قارمان چالسین